95 శాతం స్ట్రైక్ రేట్‌తో కూటమి చారిత్రాత్మక విజయం

ఆంధ్రప్రదేశ్ రాష్ట్రవ్యాప్తంగా జరిగిన మున్సిపల్, కార్పొరేషన్ ఎన్నికల్లో తెలుగుదేశం–జనసేన–బీజేపీ కూటమి 95 శాతం స్ట్రైక్ రేట్‌తో అద్భుతమైన విజయాన్ని సాధించడం పట్ల తెలుగుదేశం పార్టీ రాష్ట్ర అధ్యక్షులు, గాజువాక ఎమ్మెల్యే పల్లా శ్రీనివాసరావు హర్షం వ్యక్తం చేశారు. ఈ సందర్భంగా తెలుగుదేశం పార్టీ జాతీయ కార్యనిర్వహక అధ్యక్షులు నారా లోకేష్ ని కలిసి ఘన విజయంపై శుభాకాంక్షలు తెలియజేసి అభినందించారు. ఈ విజయం ముఖ్యమంత్రి చంద్రబాబు నాయకత్వంపై ప్రజలు ఉంచిన విశ్వాసానికి, కూటమి ప్రభుత్వ అభివృద్ధి, సంక్షేమ పాలనకు ప్రజలు అందించిన మద్దతుకు నిదర్శనమని పల్లా పేర్కొన్నారు. కూటమి భాగస్వామ్య పార్టీల మధ్య సమన్వయం, నాయకుల సమష్టి కృషి, కార్యకర్తల అహర్నిశల శ్రమ ఈ ఘన విజయానికి ప్రధాన కారణమని తెలిపారు. రాష్ట్రంలో అభివృద్ధి, సంక్షేమం, పారదర్శక పాలనకు ప్రజలు మరోసారి పట్టం కట్టారని అన్నారు.