నచ్చ‌కుంటే వదిలేయ్.. ఫ్యాన్స్ కు భాయ్ సూచన!

డిజిటల్ యుగంలో సోషల్ మీడియా అంటే కేవలం వినోద సాధనం మాత్రమే కాదు.. పరస్పర విమర్శలు, హేళనలు, సైబర్ దాడులకు వేదికగా మారుతోంది. అభిమాన హీరోలను ఆరాధించే క్రమంలో ప్రత్యర్థి వర్గాలను తక్కువ చేసి చూపడం, ట్రోల్స్ పేరిట అమూల్యమైన సమయాన్ని బూడిదలో పోసిన పన్నీరులా వృథా చేసుకోవడం నేటి యూత్‌లో సాధారణమైపోయింది. సరిగ్గా ఈ పరిస్థితుల్లోనే, సమాజంలో పెరుగుతున్న ఈ ‘విష సంస్కృతి’కి చెక్ పెడుతూ ఐకాన్ స్టార్ అల్లు అర్జున్ చేసిన ఆసక్తికర వ్యాఖ్యలు తీవ్ర చర్చనీయాంశమయ్యాయి. హైదరాబాద్‌లోని యూసుఫ్‌గూడ శౌర్య భవన్‌లో ‘అల్లు అర్జున్ ఫ్యాన్స్ అసోసియేషన్’ ఆధ్వర్యంలో వార్షిక అభిమానుల సమ్మేళనం సాగింది. సామాజిక మాధ్యమాల్లో జరిగే అవాకులు చవాకులు, అనవసర విమర్శలపై బన్నీ నేరుగా స్పందించారు. “మీకు ఎవరైనా నచ్చకపోతే వాళ్లను అస్సలు పట్టించుకోవద్దు. అనవసరంగా వాళ్లను ట్రోల్ చేయడం, ద్వేషించడం వల్ల మీ అమూల్యమైన సమయం వృథా అవుతుంది” అని హితవు పలికారు.