ఎంపీటీసీ, జెడ్పీటీసీ ఎన్నికల షెడ్యూల్‌లో మార్పులు

ఆంధ్రప్రదేశ్ రాష్ట్ర ఎన్నికల సంఘం రాష్ట్రంలోని కొన్ని జిల్లాల్లో తుఫాను ప్రభావిత పరిస్థితుల నేపథ్యంలో కలెక్టర్లు, జిల్లా ఎన్నికల అధికారులతో చర్చించింది. పరిస్థితిని అంచనా వేసి, వారు ఇచ్చిన హామీలను పరిగణనలోకి తీసుకున్న అనంతరం పట్టణ స్థానిక సంస్థల ఎన్నికల పోలింగ్‌ను వాయిదా వేయాల్సిన అవసరం లేదని రాష్ట్ర ఎన్నికల సంఘం నిర్ణయించింది. ఈ మేరకు పట్టణ స్థానిక సంస్థల ఎన్నికల పోలింగ్ నవంబర్ 1, 2026న యథావిధిగా నిర్వహించబడుతుంది. రాష్ట్ర ఎన్నికల సంఘం 19.10.2026 న రాష్ట్రంలో రెండో సాధారణ ఎంపీటీసీ, జెడ్పీటీసీ ఎన్నికల నిర్వహణకు నోటిఫికేషన్ జారీ చేసింది. ఎన్నికల షెడ్యూల్ ప్రకారం, పోటీలో ఉన్న అభ్యర్థుల జాబితాలను సంబంధిత రిటర్నింగ్ అధికారులు 27.10.2026 న మధ్యాహ్నం 3 గంటల తర్వాత ప్రచురించారు. అదే విధంగా, ఏకగ్రీవంగా ఎన్నికైన స్థానాల ఫలితాలను కూడా 27.10.2026న మధ్యాహ్నం 3 గంటల తర్వాత ప్రకటించారు. పట్టణ స్థానిక సంస్థల ఎన్నికల ఓట్ల లెక్కింపు నవంబర్ 3న జరగనుండగా, అదే రోజున ఎంపీటీసీ, జెడ్పీటీసీ ఎన్నికల పోలింగ్ నిర్వహించాల్సి ఉంది. ఈ రెండు కార్యక్రమాలను ఒకే రోజు సమర్థవంతంగా నిర్వహించడానికి అవసరమైన పోలీసు సిబ్బంది, పోలింగ్ సిబ్బంది అందుబాటులో లేకపోవడంతో ఎన్నికల షెడ్యూల్‌ను సవరించాలని రాష్ట్ర ఎన్నికల సంఘం నిర్ణయించింది. ఈ నేపథ్యంలో ఎంపీటీసీ, జెడ్పీటీసీ ఎన్నికల పోలింగ్ తేదీని నవంబర్ 3 నుంచి నవంబర్ 5, 2026కు, రీపోలింగ్ తేదీని నవంబర్ 4 నుంచి నవంబర్ 6కు, ఓట్ల లెక్కింపు, ఫలితాల ప్రకటన తేదీని నవంబర్ 5 నుంచి 7కు మారుస్తూ రాష్ట్ర ఎన్నికల సంఘం సవరించిన నోటిఫికేషన్ జారీ చేసింది.