చిన్నారుల కోసం ఓ చిన్న ప్రపంచం

ఆంధ్రప్రదేశ్ మహిళా కమిషన్ కార్యాలయంలో చిన్నారుల కోసం ప్లే ఏరియా, చిల్డ్రన్స్ లైబ్రరీని ఏర్పాటు చేశారు. కుటుంబ సమస్యలు, కౌన్సెలింగ్‌ కోసం ఆంధ్రప్రదేశ్ మహిళా కమిషన్ కార్యాలయానికి తల్లిదండ్రులతో పాటు చిన్నారులు కూడా వస్తుంటారు. ఈ సమయంలో కుటుంబ వివాదాలు, వాదోపవాదాల ప్రభావం చిన్నారులపై పడకుండా వారికి సురక్షితమైన, ఆహ్లాదకరమైన వాతావరణాన్ని కల్పించాలనే ఉద్దేశంతో ఆంధ్రప్రదేశ్ మహిళా కమిషన్ ఈ ప్లే ఏరియా ఏర్పాటుకు శ్రీకారం చుట్టింది. తల్లిదండ్రులు కౌన్సెలింగ్‌లో పాల్గొనే సమయంలో చిన్నారులు ఆటలు ఆడుతూ, పుస్తకాలు చదువుతూ సంతోషంగా సమయం గడిపేలా ఈ సౌకర్యాలను అందుబాటులోకి తీసుకువచ్చారు. ఆటల ద్వారా పిల్లల్లో ఆత్మవిశ్వాసం, శారీరక చురుకుదనం, సృజనాత్మకత పెంపొందడంతో పాటు, చిల్డ్రన్స్ లైబ్రరీ ద్వారా చదువుపై ఆసక్తిని పెంచేలా పుస్తకాలు, డ్రాయింగ్ మరియు కలరింగ్ పుస్తకాలు, పజిల్స్, ఆట వస్తువులను అందుబాటులో ఉంచారు.