విజయదశమి వేళ.. పాలపిట్ట దర్శనం

దసరా పండుగ అనగానే అమ్మవారి ఆరాధన, జమ్మిచెట్టు పూజ, బంగారం రూపంలో జమ్మి ఆకుల మార్పిడి గుర్తుకొస్తాయి. వీటితోపాటు విజయదశమి రోజున పాలపిట్టను దర్శించుకోవడం కూడా ఒక ప్రత్యేక సంప్రదాయంగా కొనసాగుతోంది. ముఖ్యంగా తెలుగు ప్రజల ఆచార వ్యవహారాల్లో పాలపిట్ట దర్శనానికి విశిష్ట స్థానం ఉంది. దసరా నవరాత్రుల ముగింపు రోజైన పదో రోజు విజయదశమి. చెడుపై మంచి సాధించిన విజయానికి ప్రతీకగా ఈ పండుగను జరుపుకుంటారు. ఈ పవిత్రమైన రోజున పాలపిట్టను దర్శించుకుంటే ఏడాది పొడవునా శుభాలు కలుగుతాయని, తలపెట్టిన పనులు విజయవంతమవుతాయని ప్రజలు విశ్వసిస్తారు. సాధారణంగా విజయదశమి రోజున ఉదయం లేదా సాయంత్రం పల్లె ప్రాంతాల్లోని పొలాలు, చెట్ల పరిసరాల్లో పాలపిట్ట కనిపిస్తుందేమోనని ఆసక్తిగా ఎదురుచూస్తుంటారు. విజయదశమి రోజున పాలపిట్టను చూడాలనే సంప్రదాయం ప్రకృతితో మనిషికి ఉన్న అనుబంధాన్ని గుర్తుచేస్తుంది.