బండ్ల గణేష్ కుమార్తె వివాహ వేడుకకు ప్రముఖులు

టాలీవుడ్ నిర్మాత బండ్ల గణేష్ కుమార్తె జనని, సూర్యతేజ వివాహ వేడుక హైదరాబాద్‌లోని జేఆర్సీ కన్వెన్షన్ సెంటర్‌లో ఘనంగా జరిగింది. వేద పండితుల మంత్రోచ్ఛారణల నడుమ సంప్రదాయబద్ధంగా జరిగిన ఈ వివాహ వేడుకకు పలువురు రాజకీయ, సినీ ప్రముఖులు హాజరై నూతన వధూవరులను ఆశీర్వదించారు. ఈ వివాహ వేడుకకు ఆంధ్రప్రదేశ్ ముఖ్యమంత్రి నారా చంద్రబాబు నాయుడు దంపతులు, తెలంగాణ ముఖ్యమంత్రి రేవంత్ రెడ్డి, పలువురు మంత్రులు, సినీ ప్రముఖులు చిరంజీవి, నాగార్జున, నాగచైతన్య, మంచు విష్ణు తదితరులు పాల్గొని నూతన దంపతులను ఆశీర్వదించారు. ఈ సందర్భంగా కుమార్తెను చూసి బండ్ల గణేష్ కన్నీళ్లు పెట్టుకున్నారు. వేడుకకు షాద్‌నగర్ ఎమ్మెల్యే, తెలంగాణ ప్రభుత్వ రంగ సంస్థల చైర్మన్ వీర్లపల్లి శంకర్ హాజరై జనని, సూర్యతేజలను ఆశీర్వదించి శుభాకాంక్షలు తెలిపారు. అనంతరం నిర్మాత బండ్ల గణేష్‌తో పాటు కుటుంబ సభ్యులను కలిసి వివాహ శుభాకాంక్షలు తెలియజేశారు.