టూవీలర్ అంబులెన్సులకు కేంద్రం అనుమతి

అత్యవసర వైద్యాన్ని అందించడానికి కేంద్ర ప్రభుత్వం టూవీలర్ అంబులెన్సులకు అనుమతినిచ్చింది. గ్రామీణ, మారుమూల ప్రాంతాల్లో వేగవంతమైన వైద్య సేవలు అందించే లక్ష్యంతో ద్విచక్ర వాహన అంబులెన్సులకు అనుమతిపై కేంద్ర ప్రభుత్వం కీలక నిర్ణయం తీసుకుంది. ఈ మేరకు కేంద్ర మోటారు వాహన నిబంధనలు-1989కి సవరణలు ప్రతిపాదించింది. ద్విచక్ర వాహన అంబులెన్సుల నిర్వహణ, రిజిస్ట్రేషన్, ఫిట్‌నెస్‌కు సంబంధించి ప్రత్యేక నిబంధనలు రూపొందించనున్నారు. ఈ ముసాయిదా నోటిఫికేషన్‌పై అభ్యంతరాలు, సూచనలు తెలియజేయడానికి 30 రోజుల సమయం కేటాయించారు. వాటిని పరిశీలించిన తర్వాత తుది నోటిఫికేషన్‌ను జారీ చేయనున్నట్లు కేంద్ర ప్రభుత్వం తెలిపింది.