కళ్యాణ మండపంలో నేత్రపర్వంగా 'గరుడ సేవ'

దేశంలోనే ప్రముఖ పుణ్యక్షేత్రంగా విరాజిల్లుతున్న సింహాచలం శ్రీ వరాహాలక్ష్మీనృసింహస్వామి వారి దేవస్థానంలో, గరుడ సేవ కమనీయంగా, నేత్రపర్వంగా జరిగింది. ఆర్జిత సేవల్లో భాగంగా నిర్వహించిన ఈ కార్యక్రమంలో, ఉత్సవమూర్తి గోవిందరాజస్వామిని కళ్యాణ మండపంలో అధిష్టింపజేశారు. పర్యవేక్షణ అధికారి పర్యవేక్షణలో, ఆలయ అర్చక స్వాములు ఈ సేవను నిర్వహించారు. పాంచరాత్రాగమశాస్త్రం విధానంలో ఈ కార్యక్రమం జరిగింది. ముందుగా పాల్గొన్న భక్తుల గోత్రనామాలను పఠిస్తూ సంకల్పం చెప్పారు. సేవ అనంతరం మంత్రపుష్పం, మంగళాశాసనాలు జరిపి, భక్తులకు వేదాశీర్వచనాలు, శేషవస్త్రాలు, స్వామివారి ప్రసాదాలను అందజేశారు. ఈ గరుడ సేవకు భక్తులు పెద్ద సంఖ్యలో హాజరై స్వామివారి కృపకు పాత్రులయ్యారు.