గ్లాసును పోలిన బకెట్.. గుర్తుపై నిషేధం

స్థానిక సంస్థల ఎన్నికల్లో స్వతంత్ర అభ్యర్థులకు కేటాయించే ఎన్నికల గుర్తుల విషయంలో రాష్ట్ర ఎన్నికల సంఘం కీలక నిర్ణయం తీసుకుంది. ‘బకెట్‌’, ‘పెన్‌స్టాండ్‌’ గుర్తులను స్వతంత్ర అభ్యర్థులకు కేటాయించే జాబితా నుంచి తాత్కాలికంగా తొలగించింది. ఈ మేరకు ఎన్నికల అధికారులకు ఆదేశాలు జారీ చేసింది. జనసేన పార్టీ ఎన్నికల సంఘం దృష్టికి తీసుకెళ్లిన అభ్యంతరాల నేపథ్యంలో ఈ కీలక పరిణామం చోటుచేసుకుంది. స్వతంత్ర అభ్యర్థులకు బకెట్‌, పెన్‌స్టాండ్‌ గుర్తులు కేటాయిస్తే.. తమ పార్టీ ఎన్నికల గుర్తు ‘గాజు గ్లాస్‌’తో ఓటర్లు గందరగోళానికి గురయ్యే అవకాశం ఉందని జనసేన ప్రతినిధులు ఎస్‌ఈసీ పేర్కొన్నారు. ఈ అంశాన్ని పరిశీలించిన ఎస్‌ఈసీ.. ఈ రెండు గుర్తులను తాత్కాలికంగా పక్కన పెట్టింది.