వరద సమస్యకు చెక్.. హైదరాబాదులో స్మార్ట్ ప్లాన్

తెలంగాణ రాజధాని హైదరాబాద్‎ను వరద సమస్య వెంటాడుతోంది. చిన్నపాటి వర్షానికీ నగరం నీట మునుగుతోంది. అదే భారీ వర్షం పడితే నగరం చెరువులను తలపిస్తోంది. రోడ్లపైకి వరద నీరు చేరి ప్రజలు నరకయాతన అనుభవిస్తున్నారు. దీంతో ప్రభుత్వం హైదరాబాద్‎లో వరద నియంత్రణ కోసం 'స్మార్ట్ వాటర్ మాస్టర్ ప్లాన్' సిద్ధం చేసేందుకు జీవో విడుదల చేసింది. దీర్ఘకాలిక పరిష్కారం కోసం జీహెచ్ఎంసీ ప్రణాళిక తయారు చేయనుంది. మాస్టర్ ప్లాన్ తయారు చేసేందుకు అర్హత కలిగిన కన్సల్టెంట్‎లను ఎంపిక చేసేందుకు టెండర్లు పిలవాలని జీహెచ్ఎంసీకి ఆదేశాలు జారీ చేసింది. మూసీ నది, హుస్సేన్ సాగర్ వల్ల ఏర్పడే వరదలను నివారించడంతో పాటు వరద నీటి కాలువలలో ఇతర వ్యర్థ జలాలు కలవకుండా చర్యలు తీసుకునేలా ప్లాన్ రూపొందిచనున్నారు.