గురు పౌర్ణమి వేడుకల్లో గిన్నిస్ ప్రపంచ రికార్డు

పవిత్ర గురు పౌర్ణమి సందర్భంగా పుట్టపర్తిలోని శ్రీ సత్యసాయి బాబా ఆలయంలో నిర్వహించిన వేడుకలు ఆధ్యాత్మిక భక్తితో, సేవా స్పూర్తితో అర్థవంతంగా సాగాయి. ఈ కార్యక్రమంలో రాష్ట్ర వైద్య ఆరోగ్య శాఖ మంత్రి సత్య కుమార్ యాదవ్, కేంద్ర వ్యవసాయ, గ్రామీణాభివృద్ధి శాఖామాత్యులు గౌరవ శివరాజ్ సింగ్ చౌహాన్ తో కలసి పాల్గొన్నారు. వేదికపై భగవాన్ శ్రీ సత్యసాయి బాబా సమాధి వద్ద మంత్రి పుష్పాంజలి ఘటించి, దేశ ప్రజలందరికీ శాంతి, సంపద, సంపూర్ణ ఆరోగ్యం కోసం ప్రార్థించారు. ఈ సందర్భంగా జరిగిన విశేష ఘట్టం – సాయి గాయత్రీ మంత్ర జపంలో ప్రపంచవ్యాప్తంగా ఒకేసారి పాల్గొన్న 11,000 మందికి పైగా భక్తుల ఘనత – అధికారిక గిన్నిస్ వరల్డ్ రికార్డ్ గా గుర్తించబడిందని మంత్రి వ్యాఖ్యానించారు. జూన్ 15, 2025న 10 నిమిషాల పాటు ఆన్లైన్‌లో ఒకేసారి పఠించిన సాయి గాయత్రీ మంత్రం 1,857 మంది భక్తుల మునుపటి రికార్డును అధిగమించి, ప్రపంచ స్థాయి రికార్డుగా నిలిచింది. ఈ రికార్డును గిన్నిస్ అధికార ప్రతినిధి స్వప్నిల్ దర్నికార్ అధికారికంగా ప్రదానం చేశారు. అలాగే ఇది కేవలం ప్రపంచ రికార్డు కాదు – ఇది సాయి మార్గంలో నడిచే భక్తుల ఆధ్యాత్మిక ఐక్యతకు నిదర్శనం. సాయి గాయత్రీలో ఐక్యమైన 11,000 స్వరాలు ప్రపంచానికి దైవిక ప్రకంపనలు పంపించాయి. భక్తి, మానవత్వం, సేవలోని విలువలు ప్రజా జీవితంలో స్ఫూర్తిగా నిలవాలి. ఈ కార్యక్రమం ద్వారా సాయి మిషన్ చేస్తున్న సేవా కార్యక్రమాలకు, ఆధ్యాత్మికత – సాంకేతికత కలయికకు నూతన దిక్సూచి ఏర్పడిందని మంత్రి హర్షం వ్యక్తం చేశారు.