ఇస్రో ఖాతాలో మరో విజయం.. LVM3-M6 ప్రయోగం

భారత అంతరిక్ష పరిశోధనా సంస్థ ISRO మరోసారి ప్రపంచం గర్వించే అద్భుతాన్ని ఆవిష్కరించింది. నేడు శ్రీహరికోట నుంచి విజయవంతంగా నిర్వహించిన LVM3-M6 ప్రయోగం, కేవలం ఒక ఉపగ్రహాన్ని కక్ష్యలోకి పంపిన ఘటన మాత్రమే కాకుండా, ఇది అంతరిక్ష వాణిజ్య మార్కెట్‌లో భారత్ తిరుగులేని శక్తిగా ఎదిగిందని చాటి చెప్పిన చారిత్రాత్మక ఘట్టంగా నిలిచింది. ఈ అసాధారణ విజయానికి వెన్నెముకగా నిలిచిన ఇస్రో శాస్త్రవేత్తల కృషి, వారి సాంకేతిక నైపుణ్యం, అంకితభావం నిజంగా అమోఘం. సుమారు 6,100 కిలోల బరువున్న భారీ BlueBird Block-2 ఉపగ్రహాన్ని అత్యంత కచ్చితత్వంతో నిర్దిష్ట కక్ష్యలో ప్రవేశపెట్టడం అంత సామాన్యమైన విషయం కాదు. ప్రపంచంలో అతికొద్ది దేశాలకు మాత్రమే సాధ్యమైన ఈ ఘనతను, భారత శాస్త్రవేత్తలు తమ ప్రెసిషన్ ఇంజనీరింగ్ తో సాధించి చూపారు. ఈ ప్రయోగం ద్వారా భారత్ హెవీ-లిఫ్ట్ లాంచ్ సామర్థ్యంలో ప్రపంచ అగ్రశ్రేణి దేశాల సరసన నిలిచిందని స్పష్టమైంది.