సింగిల్ మేజర్ డిగ్రీ స్థానంలో డ్యూయల్

ఆంధ్రప్రదేశ్ ఉన్నత విద్యామండలి సాధారణ డిగ్రీ విద్యలో కీలక మార్పు చేసింది. ప్రస్తుతం సింగిల్ మేజర్ డిగ్రీ విధానం అమల్లో ఉండగా.. తాజాగా డ్యూయల్ మేజర్ (రెండు ప్రధాన సబ్జెక్టులు) డిగ్రీ విధానాన్ని ప్రవేశపెట్టింది. ఈ మేరకు కొత్త విధానంపై నోటిఫికేషన్ జారీచేసింది. 2025-26 విద్యా సంవత్సరానికి కాలేజీలు.. సింగిల్ మేజర్ నుంచి డ్యూయల్ మేజర్‌కు మారేందుకు దరఖాస్తు చేసుకోవాలని సూచించింది. వాటి కాంబినేషన్లను సంబంధిత యూనివర్సిటీలు విడుదల చేస్తాయని తెలిపింది. దీంతో వచ్చే విద్యా సంవత్సరం నుంచి డిగ్రీ స్వరూపం మళ్లీ మారనుంది.