యువకుడి ప్యాంటు జేబులో పేలిన ఫోన్

వివో స్మార్ట్ ఫోన్ పేలడంతో యువకుడికి తీవ్ర గాయాలైన సంఘటన హైదరాబాద్‌లో చోటు చేసుకుంది. హైదరాబాద్‌లోని రాజేంద్రనగర్ అత్తాపూర్‌లో శ్రీనివాస్ అనే యువకుడు వివో ఫోన్ వాడి జేబులో పెట్టుకున్నాడు. అప్పటికే హీటెక్కిన ఫోన్.. జేబులోనే ఒక్కసారిగా పేలిపోయింది. వెంటనే అప్రమత్తమై.. జేబులో నుంచి ఫోన్ తీసిన శ్రీనివాస్ దూరంగా పారేశాడు. అయితే.. అప్పటికే ఫోన్ హీట్ అవ్వడంతో శ్రీనివాస్ కాలుకి తీవ్ర గాయమైంది. పైనున్న చర్మం కాలి.. మరో లేయర్ వరకు గాయం చేరిందని డాక్టర్ తెలిపారు. వెంటనే అప్రమత్తం అవ్వకపోయి ఉంటే.. తీవ్రంగా గాయాలై ఉండేవని అన్నారు. ఇంటర్ నెట్ డాటా ఆన్‌లో ఉంచితే ఫోన్ వేడెక్కి ఇలాంటి ప్రమాదాలు జరగడానికి ఆస్కారం ఉంటుందని నిపుణులు చెబుతున్నారు.