స్పీకర్ చొరవతో 'హెల్త్ క్లినిక్'లకు మహర్దశ!

నర్సీపట్నంలో అర్ధాంతరంగా నిలిచిపోయిన విలేజ్ హెల్త్ క్లినిక్ భవనాలకు శాసనసభ స్పీకర్ చొరవతో మహర్దశ పట్టింది. ప్రజల ఆరోగ్యానికి, మౌలిక సదుపాయాల కల్పనకు పెద్దపీట వేస్తున్న స్పీకర్, సగం పనులతో నిరుపయోగంగా పడి ఉన్న ఈ భవనాలను పూర్తి చేయాలన్న పట్టుదలతో నిధులను మంజూరు చేయించారు. నియోజకవర్గ పరిధిలోని నాలుగు మండలాల్లో ఆగిపోయిన 22 విలేజ్ హెల్త్ క్లినిక్ భవనాలను పూర్తి చేయడానికి ఏకంగా రూ. 291.35 లక్షల నిధులను సాధించినట్లు తెలిపారు. స్పీకర్ కృషితో నర్సీపట్నం మండలంలోని 4 భవనాలకు రూ. 47.45 లక్షలు, నాతవరం మండలంలోని 7 భవనాలకు రూ. 88.30 లక్షలు, గొలుగొండ మండలంలోని 6 భవనాలకు రూ. 81.50 లక్షలు, మాకవరపాలెం మండలంలోని 5 భవనాలకు రూ. 74.10 లక్షలు మంజూరయ్యాయి. నిధులు మంజూరు చేయించడంతోనే సరిపెట్టకుండా, కేటాయించిన ఈ నిధులతో తక్షణమే పనులు ప్రారంభించి యుద్ధప్రాతిపదికన పూర్తి చేయాలని ఆదేశించారు. నిర్మాణాల్లో నాణ్యతా లోపాలు లేకుండా చూసుకుని, త్వరలోనే ఈ వైద్య కేంద్రాలను ప్రజలకు అందుబాటులోకి తీసుకొచ్చేలా చూడాలని స్పీకర్ దిశానిర్దేశం చేశారు.