ఇబ్రహీంపట్నం మండలంలో స్పోర్ట్స్ సిటీ

ఇబ్రహీంపట్నం మండలంలోని పలు గ్రామాల్లో స్పోర్ట్స్ సిటీ నిర్మాణానికి సేకరించనున్న భూములకు సంబంధించిన రైతులతో మైలవరం శాసనసభ్యులు వసంత వెంకట కృష్ణప్రసాదు ప్రత్యేకంగా సమావేశమయ్యారు. విజయవాడలోని జిల్లా కలెక్టరేట్లో కలెక్టర్ జి.లక్ష్మీశ , సిఆర్డిఏ అధికారులతో కలిసి రైతులతో సమావేశమైన ఎమ్మెల్యే కృష్ణప్రసాదు మాట్లాడుతూ మైలవరం నియోజకవర్గం అమరావతిలో భాగమైందన్నారు. ఇక్కడ స్పోర్ట్స్ సిటీ ఏర్పాటయితే ఈ ప్రాంతం పూర్తిగా అభివృద్ధి చెందుతుందని, ఇబ్రహీంపట్నం మండల పరిధిలోని పలు గ్రామాల రూపురేఖలు పూర్తిగా మారిపోతాయని పేర్కొన్నారు. ఇబ్రహీంపట్నం మండలంలోని కొటికలపూడి, మూలపాడు, కేతనకొండ గ్రామాల్లో ఇప్పటికే అధికారులు గ్రామసభలు నిర్వహించగా, ఈ గ్రామసభలలో ఎక్కువ మంది స్పోర్ట్స్‌ సిటీ నిర్మాణం కోసం తమ భూములు ఇచ్చేందుకు ఆసక్తి చూపించారన్నారు. ఆ మేరకు గ్రామసభల్లో తీర్మానాలు కూడా చేశారన్నారు. ల్యాండ్ పూలింగ్ పద్ధతిలో భూములు సేకరించడం వల్ల రైతులకు ఎటువంటి నష్టం ఉండదన్నారు. పైగా పలువురు రైతులు మాట్లాడుతూ స్పోర్ట్స్ సిటీ ఏర్పాటు పట్ల హర్షం వ్యక్తం చేశారు.