వివేకా హత్యపై పీఏ తప్పు కేసు? పోలీసులు కీలక ప్రకటన

మాజీ మంత్రి వైఎస్ వివేకానందరెడ్డి హత్య కేసు మరోసారి తెరపైకి వచ్చింది. తెలుగు రాష్ట్రాల్లో తీవ్ర చర్చనీయాంశంగా మారిన ఈ కేసులో కొత్త కోణాలు వెలుగులోకి వస్తూనే ఉన్నాయి. తాజాగా వివేకా పీఏ కృష్ణారెడ్డి పెట్టిన ఫిర్యాదుపై పులివెందుల పోలీసులు కీలక ప్రకటన చేశారు. 2023 డిసెంబర్ 15న మాజీ మంత్రి వివేకానందరెడ్డి పర్సనల్ అసిస్టెంట్ (PA) కృష్ణారెడ్డి చేసిన ఫిర్యాదు ఆధారంగా వివేకా కుమార్తె సునీత, అల్లుడు రాజశేఖర్ రెడ్డి, సీబీఐ ఎస్పీ రామ్ సింగ్‌లపై అప్పటి పోలీసులు కేసు నమోదు చేశారు. అయితే, తాజాగా జరిగిన విచారణలో ఆ కేసు తప్పుడు కేసుగా నిర్ధారణ అయ్యింది. పులివెందుల పోలీసులు తమ విచారణను పూర్తిచేసి, జమ్మలమడుగు కోర్టులో చివరి ఛార్జ్ షీట్‌ను సమర్పించారు. పులివెందుల డీఎస్పీ ఈ కేసుకు సంబంధించిన ఫైనల్ ఛార్జ్ షీట్‌ను కోర్టులో సమర్పించారు. అయితే, పులివెందుల మేజిస్ట్రేట్ సెలవులో ఉండటంతో జమ్మలమడుగు కోర్టులో ఛార్జ్ షీట్ దాఖలైంది. ఈ కేసులో మొత్తం 23 మంది సాక్షులను విచారించామని పోలీసులు వెల్లడించారు. ఈ కేసు వెనుక రాజకీయ కుట్రలు, వ్యక్తిగత కక్షలు ఉన్నాయనే వాదనలు వినిపిస్తున్నాయి. వైఎస్ వివేకానందరెడ్డి హత్య కేసు విచారణ వేగంగా సాగుతున్న తరుణంలో, ఈ కేసును తప్పుడు కేసుగా నిర్ధారించడమే కాదు, దీనిపై రాజకీయ ఒత్తిళ్లు కూడా ఉన్నాయా? అన్న ప్రశ్నలు తలెత్తుతున్నాయి.