నాడు దాడులు చేసిందెవరు జగన్?

నేడు ప్రజాస్వామ్యం గురించి ప్రశ్నిస్తున్న జగన్.. 2020 స్థానిక సంస్థల ఎన్నికల్లో ప్రతిపక్షాలపై జరిగిన దాడుల ఆరోపణలకు సమాధానం చెప్పాలని మంత్రి కింజరాపు అచ్చెన్నాయుడు డిమాండ్ చేశారు. మాచర్లలో బోండా ఉమ, బుద్ధా వెంకన్నల వాహనంపై దాడి జరిగినప్పుడు జగన్‌కు ప్రజాస్వామ్యం, రాజ్యాంగం గుర్తుకురాలేదా అని ప్రశ్నించారు. పుంగనూరులో జనసేన అభ్యర్థి నామినేషన్ పత్రాలు చింపివేశారనే ఆరోపణలపై జగన్ ప్రభుత్వం అప్పట్లో ఏం చర్యలు తీసుకుందని అడిగారు. నాడు టీడీపీ, జనసేన అభ్యర్థులను నామినేషన్లు వేయకుండా అడ్డుకున్నారనే ఫిర్యాదులకు సమాధానం ఇవ్వకుండా నేడు జగన్ నీతులు చెప్పడమేంటన్నారు. ఎన్నికల సంఘం స్వతంత్రత గురించి మాట్లాడే జగన్.. నిమ్మగడ్డ రమేష్ కుమార్ పదవీకాలాన్ని తగ్గిస్తూ ఆర్డినెన్స్ ఎందుకు తీసుకొచ్చారని ప్రశ్నించారు. మిథున్‌రెడ్డి ఘటనపై జగన్ చేసిన ఆరోపణలతో సహా ఎన్నికల హింసపై నిష్పాక్షిక దర్యాప్తు జరగాలి.. ఎవరు తప్పు చేసినా చట్టప్రకారం చర్యలు తప్పవని మంత్రి కింజరాపు అచ్చెన్నాయుడు స్పష్టం చేశారు.